صباح الخير يا طهران الوفية
طهران
ﺼﺒﺎﺡ ﺍﻟﺨﻴﺭ ﻴﺎ ﻁﻬﺭﺍﻥ ﺍﻟﻌﺯﻴﺯﺓ
ﺼﺒﺎﺡ ﺍﻟﻨﺼﺭ
ﻭﺒﻠﻭﻍ ﺍﻟﻤﻨﺎل
ﻋﺯﻓﻨﺎ ﺍﻟﻔﺭﺤة ﻏﻨﻭﻩ
ﻭ ﻗﻠﻨﺎ ﺍﻟﺸﻌﺭ
ﻭﺭكبنا ﺍﻟﺨﻴﺎل
ﺃﺩﻴﻜﻲ ﺼﺤﻴﺘﻲ ﺒﻌﺩ ﺍﻟﻨﻭﻡ
ﻋﺭﻭﺴﺔ ﻭﻻ كل العرايس في الجمال
شهودك ناس
ومهرك ناس يا غالية
يا أغلى الناس
حلال فيكي الدلال
نداكي ضحكة
في عيون العذارى
وشمسك فرحة ف عيون الرجال
ونسمة صبحك الصاحي
بشاير
لبكرة الآتي
بالعيد للعيال
وغنوة عندليبك
في العلالي شارب العاشقين
بعد الوصال صباح الخير
يا طهران الوفية
صباح النصر
وبلوغ المنال
أول كلام
كلامنا عن إيران
ما لوش طبعا مكان
فى اعلام الخيانة
وصوت الأمريكان
لان الأمن شايف
بان الأخ خايف
ليلزق على الشفايف
ويلبس فى الودان
كلام عن الخيانة
ومن عالم جعانة
فتظهر الادانة
على الشاه اللى خان
ادانه يعنى ثورة
ما تقبلش المناورة
وفضح وكشف عوره
واخر بهدلان
فليه الامن يرضى
يبحبح للمعارضة
دى عالم يابا مرضى
واغلبهم جعان
وهكذا الطريقة
طناش
على الحقيقة
فتبقى الناس
غريقه
وتسمع شقلبان
لهذا
او لذلك
حنمشى فى المسالك
ونطلع م الزمالك
نخش الترجمان
وكلمتنا نقولوها
حليب من بز أبوها
فناسنا يسمعوها
فيحصل بغبغان
فهات ودنك يا خلي
اقولك وانت قوللي
وسيبك م اللي واللي
ونحكى
عن إيران
الفرحة
فرحانين .. فرحانين .. فرحانين
كل ثورة وإحنا دايما فرحانين
اللي ماتوا فى المعارك .. فرحانين
واللي حضر واللي شارك.. فرحانين
واللي ساكنين الخنادق.. فرحانين
والماسكين على المبادئ.. فرحانين
واللي شايلين شوق لفكرة.. فرحانين
واللي حاملين هَمّ بكرة.. فرحانين
اللي كلمتهم أمانة.. فرحانين
واللي معدتهم جعانة فرحانين
إحنا ملح الأرض وتراب العجين
كل صناع الورود والمبدعين فرحانين
عد موج البحر ونجوم الليالي
عد رمل الأرض واكتر من السنين
قولوا قولوا .. فرحانين
كل ثورة وإحنا دايما فرحانين
قولوا قولوا .. فرحانين
الرعب
مرعوبين
مرعوبين
مرعوبين
مش باقولك ياحبيبي
مرعوبين
واللى رقصوا فى حضن كارتر
مرعوبين
اللى كان فاكرينه عنتر
مرعوبين
واللى سافروا لجولدا ماير
مرعوبين
و اللي بيغلو السجاير
مرعوبين
والنسايب والقرايب
مرعوبين
والمشايخ فى الزكايب
مرعوبين
والسفاك المصريكانى
مرعوبين
والفراخ الأمريكانى
مرعوبين
كل حكام الخيانة الماجورين
والسماسرة والحشم والطباخين
مهما حاولوا يخوفوكوا
بالعساكر
فتشوهم حتلاقوهم مرعوبين
مش باقولك ياحبيبى
مرعوبين
الثورة
مارد رفض وانتفض
زلزل عروش العار
الشمس ولا الجبل
ولا المحيط هدار
ولا القمر فى السما
فجر سحاب النار
ولا الربيع انتشر
غطى الوجود ثوار
ولا النشيد انطلق
عالى على الاسوار
طير سلاح الحرس
من لمسه الاوتار
ولا نسيم الصبا
ولا هوا الاعصار
انت الجميع كلهم
والكل فيك حضار
يا شعب لما رفض
يا شعب لما اختار
سطر بدم الشرف
أنشودة الأحرار
نار الخيانة حطب
نار الشعوب صبار
لشاعر الفقراء المصري العربي الكبير المرحوم احمد فؤاد نجم
